எடுப்பு
வாழ்த்துவமே! – இறைமை
தமிழ்செய்து வாழ்த்துவமே! – மலர்மிசையில்
– என்றும்
தொடுப்பு
அன்பியமே அதில் பிறங்கும் சிவமயமே!
அகரமுதல் மெய்கண்ட திருமந்திரமே!
எண்குணத் தறவாழி அந்தணமே! – எங்கள்
ஆதியமே! அருட்பெருஞ் சோதியமே!
– வாழ்த்துவமே!
முடிப்பு
ஐந்திணை முக்கழக மொழித்திறமே!
அறிதொறும் அறியாமை அகற்றும் அகம்புறமே!
ஐந்தியக்கும் ஆற்றல் பரம்பரமே – எதிலும்
அணுவுக் கணுவாகி ஆடும் ஆடலமே!
– வாழ்த்துவமே!
முடுகு
எழுத்தொடு சொல்பொருள் வேர்நெறி
முளைத்தெழும் முதல் மொழி வாழியவே!
அறம்பொருள் இன்பம் வீடெனத்
தமிழ்தரு நான்மறை வாழியவே!
குமரியிற் பிறந்து பரவிய
உலகப் பரம்பரை வாழியவே!
ஒருமை இறைநினை வுரிமையில்
முப்பொருள் உலகெலாம் வாழியவே!
இயற்கை வாழியவே – செந்
தண்மை வாழியவே
இறைமை வாழியவே – செந்
தமிழ்மை வாழியவே!
– வாழ்த்துவமே!
- இர.திருச்செல்வம்
Leave a Reply